Bakı Dövlət Universitetində “Çoxqatlı təhlükəsizlik arxitekturası” mövzusunda Ustad dərs keçirilmişdir
Bu gün, 21 aprel 2026-cı il tarixində, Bakı Dövlət Universitetində informasiya və kibertəhlükəsizlik sahəsinə həsr olunmuş mühüm elmi-praktik tədbir keçirilmişdir. Tədbir Tətbiqi Riyaziyyat və Kibernetika fakültəsinin dekanı, professor Ələkbər Əliyevin giriş nitqi ilə açılmışdır. Professor Ələkbər Əliyev çıxışında müasir dövrdə elektron və informasiya təhlükəsizliyinin cəmiyyət, dövlət və təhsil müəssisələri üçün xüsusi əhəmiyyət daşıdığını vurğulamış, belə tədbirlərin tələbələrdə müasir risklərə qarşı daha yüksək bilik və məsuliyyət formalaşdırdığını qeyd etmişdir. Daha sonra fakültədə fəaliyyət göstərən Kiber klubun rəhbəri, dosent Natiq Quliyev çıxış edərək klubun fəaliyyəti və həyata keçirdiyi təşəbbüslər haqqında məlumat vermiş, tələbələrin kibertəhlükəsizlik istiqamətində praktiki biliklərinin artırılmasının vacibliyini xüsusi olaraq diqqətə çatdırmışdır.
Tədbirin əsas qonağı olan Fərid Zeynalov, hazırda Azərbaycan Respublikasının Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin rəisi, “Çoxqatlı təhlükəsizlik arxitekturası” mövzusu üzrə geniş və məzmunlu çıxış etmişdir. Onun çıxışı iştirakçılar tərəfindən böyük maraqla qarşılanmış və auditoriyada geniş diskussiya mühiti yaratmışdır. Təqdimatda çoxqatlı təhlükəsizlik arxitekturasının rəqəmsal sistemlərin və məlumatların qorunmasında mühüm rol oynadığı izah edilmiş, müasir kibertəhdidlərin mürəkkəb xarakterinin vahid müdafiə vasitəsi ilə deyil, bir-birini tamamlayan təhlükəsizlik qatları ilə daha effektiv şəkildə qarşılandığı vurğulanmışdır. Çıxış zamanı minimum səlahiyyət prinsipi, dərinləşdirilmiş müdafiə prinsipi və təhlükəsiz standart ayarlar prinsipi xüsusi olaraq diqqətə çatdırılmış, fiziki təhlükəsizlik, perimetr təhlükəsizliyi, şəbəkə təhlükəsizliyi, endpoint təhlükəsizliyi, tətbiq təhlükəsizliyi və məlumat təhlükəsizliyinin vahid sistemin əsas tərkib hissələri olduğu bildirilmişdir. Təqdimatda həmçinin istifadəçi maarifləndirilməsi və davranış təhlükəsizliyinin bu arxitekturanın ayrılmaz elementi olduğu vurğulanmış, texniki həllərlə yanaşı, insan amilinin də kibertəhlükəsizlikdə həlledici rol oynadığı qeyd edilmişdir. Çıxışda risklərin əvvəlcədən qiymətləndirilməsi, təhlükəsizlik siyasətlərinin yenilənməsi və beynəlxalq standartların tətbiqinin vacibliyi barədə ətraflı məlumat verilmişdir.
Tədbir iştirakçıları təqdim olunan yanaşmaların həm dövlət, həm özəl, həm də təhsil sektorunda praktik əhəmiyyətini yüksək qiymətləndirmişlər. Müzakirələr zamanı tələbələr və universitet əməkdaşları mövzu ilə bağlı çoxsaylı suallar səsləndirmiş və Fərid Zeynalov, verilən sualları ətraflı cavablandıraraq mövzuya dair praktiki və nəzəri məqamları aydın şəkildə izah etmişdir. Tədbir iştirakçılara kibertəhlükəsizlik sahəsində aktual çağırışlar və müasir müdafiə mexanizmləri barədə faydalı biliklər qazandırmış, Bakı Dövlət Universitetində keçirilən bu görüş informasiya təhlükəsizliyi sahəsində maarifləndirmənin artırılması baxımından əhəmiyyətli və uğurlu bir təşəbbüs kimi dəyərləndirilə bilər.
