Bakı Dövlət Universiteti Tətbiqi riyaziyyat və kibernetika fakültəsi

25 oktyabr 2024-cü il tarixində Bakı Dövlət Universitetinin (BDU) 105 illik yubileyi ilə əlaqədar BDU-nun Tətbiqi riyaziyyat və kibernetika fakültəsinin professor müəllim heyəti və 1-ci kurs tələbələrinin iştirakı ilə “İnnovativ həllərin kəsişdiyi məkan” adlı tədbiri keçirilmişdir. Öncə Azərbaycan Respublikasının Dövlət himni səsləndirilmiş, daha sonra ölkəmizin ərazi bütövlüyü uğrunda həlak olan şəhidlərimizin əziz xatirəsi bir dəqiqəlik sükutla yad edilmişdir. Tədbirin ilk dəqiqələrində fakültənin zəngin tarixini əks etdirən videoçarx təqdim olunmuşdur.

Sonra Kompüter elmləri ixtisasının 2-ci kurs tələbəsi Vaqif Bənnalının ifasında Müslüm Maqomayevin “Azərbaycan” mahnısı səsləndirilmişdir, həmçinin İnformatika müəllimliyi ixtisasının 4-cü kurs tələbəsi Arzu Hüseynovanın ifa etdiyi “Sarı gəlin” mahnısı təqdim edilmişdir.

Tədbirdə çıxış edən rektor Elçin Babayev ölkəmiz üçün yüksəkixtisaslı kadrların hazırlanmasında Bakı Dövlət Universitetinin özünəməxsus ənənələri, çəkisi olduğunu bildirmiş və qeyd etmişdir ki, Tətbiqi riyaziyyat və kibernetika fakültəsi 1972-ci ildə Ulu Öndər Heydər Əliyevin təşəbbüsü ilə yaradılmışdır. Hazırda fakültədə “Kompüter elmləri”, “İnformatika müəllimliyi”, günümüzün ən çox tələb etdiyi sahə olan “İnformasiya təhlükəsizliyi” ixtisasları vardır. Bütün bunlar müasir dövrün tələbələrinə uyğun olaraq tədrisin keyfiyyətinin və kadr potensialının artırılması məqsədini daşıyır. Artıq fakültənin həyatında növbəti yeni mərhələ başlayır.

Çıxış üçün söz BDU-nun Tətbiqi riyaziyyat və kibernetika fakültəsinin dekanı, professor Ələkbər Əliyevə verilmişdir. O, fakültə haqqında, fakültə strukturu, professor müəllim heyəti və tələbə kontingenti haqqında ümumi məlumat vermişdir. Fakültə dekanı Ələkbər Əliyev Tətbiqi riyaziyyat və kibernetika fakültəsi adından cənab Elçin Babayevə xatirə olaraq üzərində Azərbaycanın işğaldan azad olunmuş rayonları qeyd olunan Bütöv Azərbaycanın xəritəsini təqdim etmişdir.

BDU-nun Tətbiqi riyaziyyat və kibernetika fakültəsinin professoru Nihan Əliyev, dosent Adil Qəhrəmanov, dosent Qurban Qasımov çıxışlarında fakültənin uğurlarından danışıb, xatirələrini bölüşmüşlər.

Tədbir fakültənin müəllim və tələbələrinin hazırladığı bədii hissə ilə davam etmişdir.