Bakı Dövlət Universiteti Tətbiqi riyaziyyat və kibernetika fakültəsi

   Bakı Dövlət Universitetinin Tətbiqi Riyaziyyat və Kibernetika fakültəsində Ümummilli Lider Heydər Əliyevin anadan olmasının 103-cü ildönümünə həsr olunmuş ingilisdilli tədbir keçirilib.

   Tədbir YENİ SABAH qrupu tərəfindən təşkil olunub və müəllim Gülşən Məhərrəmovanın rəhbərliyi ilə baş tutub. Tədbirin əsas məqsədi tələbələrin ingilis dili bilik və nitq bacarıqlarının inkişaf etdirilməsi, eyni zamanda Ümummilli Lider Heydər Əliyevin zəngin siyasi irsinin, dövlətçilik ideyalarının və Azərbaycan xalqı qarşısındakı misilsiz xidmətlərinin gənclər arasında təbliğ olunması olub. Tədbir zamanı tələbələr ingilis dilində hazırladıqları çıxışlar, təqdimatlar və məlumatlarla Heydər Əliyevin həyat və fəaliyyətinin müxtəlif istiqamətlərinə toxunublar. Çıxışlarda Ulu Öndərin Azərbaycan dövlətçiliyinin möhkəmləndirilməsi, ölkənin beynəlxalq arenada tanınması, təhsil sahəsinə göstərdiyi xüsusi diqqət və gənclərə verdiyi böyük dəyər haqqında ətraflı məlumat verilib. Tələbələr həmçinin Heydər Əliyevin rəhbərliyi dövründə həyata keçirilən mühüm islahatları, milli-mənəvi dəyərlərin qorunması istiqamətində gördüyü işləri və müasir Azərbaycanın inkişafındakı əvəzsiz rolunu xüsusi vurğulayıblar. Təqdimatlar zamanı tarixi faktlar, maraqlı məlumatlar və vizual materiallar nümayiş etdirilərək tədbirin daha yadda qalan və maarifləndirici olması təmin edilib. Tələbələrin fəal iştirakı ilə keçən tədbir həm maarifləndirici, həm də motivasiyaedici mühit yaradıb.

   Bu cür tədbirlərin keçirilməsi tələbələrin ictimai fəallığının artırılması, onların dünya görüşünün genişləndirilməsi və milli dəyərlərə bağlılığının gücləndirilməsi baxımından mühüm əhəmiyyət daşıyır. Sonda tədbir iştirakçıları xatirə şəkilləri çəkdirib, öz təəssüratlarını bölüşüb və gələcəkdə də bu kimi intellektual və maarifləndirici layihələrin davam etdirilməsinin vacibliyini qeyd ediblər.