“Unutmadıq unutdurmarıq” adlı anım tədbiri keçirilib
BDU-nun Tətbiqi riyaziyyat və kibernetika fakültəsinin təşəbbüsü ilə 27 oktyabr 2023-cü ildə Tətbiqi riyaziyyat və kibernetika fakültəsinin məzunları, 2-ci Qarabağ müharibəsi şəhidləri Tural Eyyubov və Rabil İsmayılovun xatirəsinə həsr olunmuş “Unutmadıq unutdurmarıq” adlı anım tədbiri keçirilib. Tədbirdə fakültənin professor-müəllim heyəti, tələbələr, şəhidlərin ailə üzvləri və fakültə qaziləri iştirak ediblər. Tədbir Azərbaycan Respublikasının Dövlət Himninin səsləndirilməsi və Vətən müharibəsi şəhidlərinin əziz xatirəsini bir dəqiqəlik sükutla yad edilməsi ilə başlayıb.
Tədbiri giriş nitqi ilə açan fakültənin dekanı Akademik Məhəmməd Mehdiyev Vətən müharibəsində torpaqlarımızın ərazi bütövlüyü uğrunda şəhid olan qəhrəmanlarımızın xatirəsinin daima qəlblərdə yaşayacağını, gələcək nəsillərin onları daima hörmət və ehtiramla, qürur mənbəyi olaraq yad edəcəklərini bildirib. Daha sonra fakültənin dosenti Şamo Cəbrayılov və 1-ci Qarabağ müharibəsi iştirakçısı dosent Hacı Məsmalıyev də öz ürək sözləri ilə çıxış ediblər. Tədbirdə 44 günlük Vətən müharibəsinə həsr edilmiş videoçarx nümayiş olunduqdan sonra, fakültənin tələbələri Cəmil Babayev və Orxan İsmayılzadə "Cənab Leytenant" mahnısını ifa ediblər.
Şəhid Tural Eyyubov və Şəhid Rabil İsmayılov haqqında videoçarxlar nümayiş etdirildikdən sonra, tədbirdə iştirak edən şəhidlərin valideynləri və tələbə yoldaşları çıxış edərək şəhidlərlə bağlı xatirələrini bölüşüblər. Fakültənin tələbələri Aydan Hüseynova "Şəhid anası", Xalidə Hacıyeva "Qardaşım", İskəndər Məmmədov “Şəhidim” şeirləri ilə çıxış ediblər. Tədbirdə fakültənin tələbələrinin ifasında səsləndirilmiş “Xudayar təsnifi”-nin ardından fakültənin məzunu 2-ci Qarabağ müharibəsi qazisi Vüsal Qarayev və ikinci kurs tələbəsi qazi Tural Şirəliyev keçdikləri döyüş yolundan, xalqın həmrəyliyi və birliyindən, onlara dövlət və xalqın yüksək diqqət və qayğısından danışıblar. Fakültənin tələbələri Aygül Hüseynova və Orxan İsmayılzadənın ifasında "Vətənim kimiyəm" mahnısı səsləndirilmişdir. Tədbir tələbələrin "Azərbaycan" mahnısının ifası ilə yekunlaşdırılımışdır.
