II Qarabağ müharibəsi şəhidlərinin Anım günü
Tətbiqi riyaziyyat və kibernetika fakültəsində 27 sentyabr II Qarabağ müharibəsi şəhidlərinin Anım günü ilə əlaqədar olaraq tədbir keçirilmişdir. Tədbirdən əvvəl universitetin binası qarşısında tələbə və müəllim heyətinin iştirakı ilə şəhidlərin xatirəsi anılmışdır.
Daha sonra tədbir fakültənin 204 saylı otağında davam etdirildi. Tədbirdə fakültənin professor-müəllim heyəti, tələbələr və qonaqlar iştirak edirdilər. Tədbiri fakültənin dosenti Şamo Cəbrayılov öz cıxışı ilə açdı. Daha sonra şəhidlərin xatirəsi bir dəqiqəlik sükutla yad olundu və Azərbaycan Respublikasının Dövlət Himni səsləndirildi.
Fakültənin tələbələri Əlizadə Elyana və Novruzov Əsgər 44 günlük müharibə və fakültənin şəhidləri, qaziləri, müharibə iştirakçıları haqqında ətraflı məlumatlar verdilər. Şanlı Zəfər tariximizə müxtəlif video-çarxlar və video-slaydlar ilə baxış keçirildi.
Tədbir iştirakçılarından hərbi ekspert Alparslan İmamqulu, 2-ci Qarabağ müharibəsinin iştirakçıları baş leytenant Asif Cümşüdov, əsgər Sədi Novruzlu öz döyüş xatirələrindən danışaraq tədbir iştirakçılarına cəbhədə göstərilən qəhrəmanlıqları virtual olaraq yaşatdılar.
Daha sonra fakültədə təhsil alan tələbənin valideyni 2-ci Qarabağ müharibəsi iştirakcısı Buqay Məmmədli və fakültənin baş müəllimi 1-ci Qarabağ müharibəsinin iştirakçısı olmuş Hacı Məsmalıyev öz döyüş xatirələrindən danışaraq Şanlı Qələbəyə qədər olan şərəfli döyüş yolundan bəhs etdilər.
Fakültədə hal-hazırda təhsil alan şəhid yoldaşları və onların övladları da tədbirdə iştirak edirdilər.
Tədbir fakültə tələbələrinin ifasında səslənmış Xudayar təsnifi ilə yekunlaşdı və sonda tələbə Səbinə Şirinovaya vətənpərvər ruhda çəkdiyi şəkillərə görə təşəkkür edildi.
Tədbirin təşkilində Tədris işləri üzrə dekan müavini Abbas Mehdiyev, tyutorlar, tələbələr Səbinə Şirinova, İsgəndər Məmmədov və Vüsal İsayev də rol oynamışdı.